Беш нафар шахматчи бир хилда очко билан пешқадамлик қиляпти

Айлана тарзда ўтказилаётган эркаклар ўртасидаги мусобақада 5 нафар халқаро гроссмейстер - Нодирбек Абдусатторов (2550, чемпионатнинг биринчи рақамли иштирокчиси), Сайдали Йўлдошев (2469), Марат Жумаев (2451), Алексей Барсов (2411) ва Тохир Воҳидов (2400) дона суряпти. 

Еттинчи турда дунё тарихидаги энг ёш иккинчи халқаро гроссмейстер мақомига эришган Нодирбек Абдусатторов қора доналарда яна бир ёш иқтидор эгаси Жавоҳир Синдаров билан дуранг ўйнади. Қўшимча кўрсаткичларга кўра карвонбошилик қилаётган Никита Хорошев Нодирбек Ёқуббоев билан муросага келди. 

Улуғбек Тиллаевдан устун келган тажрибали гроссмейстер Марат Жумаев ҳам очколари сонини 4,5тага етказиб олди. Бу турда Тоҳир Воҳидов, Акмал Файзуллаев ва Сайидали Йўлдошев ҳам ғалабага эришди. 

Бугун ўтказиладиган саккизинчи тур олдидан бирйўла беш нафар шахматчи -Никита Хорошев, Марат Жумаев, Жавоҳир Синдаров, Нодирбек Абдусатторов ва Нодирбек Ёқуббоев 4,5тадан очко жамғариб пешқадамлик қилишяпти.