Блиц йўналишининг илк кунидан сўнг шахматчиларимиз нечанчи ўринларни банд этиб туришибди?

Дунёнинг кучли гроссмейстерлари қаторида ўзбекистонлик 11 нафар шахматчи ҳам жаҳон чемпионлиги учун дона сурмоқда. Илк кунги баҳсларда 12 та тур ўйналди. Ўн икки имкониятдан 10 очко тўплаган АҚШ вакили Хикару Накамура якка пешқадам бўлиб турибди. Қўшимча кўрсаткичларга кўра нидерландиялик Аниш Гири иккинчи, жаҳон тождори, рапид йўналишида жаҳон чемпиони Магнус Карлсен (Норвегия) учинчи ўринни банд этган. 

Ҳамюртларимиз орасида энг яхши натижани бироз кутилмаганда 16 ёшли Муҳиддин Мадаминов (2333) қайд этди. У 12 имкониятдан 8 очко жамғариб, қўшимча кўрсаткичларга кўра 18-поғонадан жой олган. 14-ўриндаги Денис Лазавикда ҳам 8 очко бор. Мадаминов ўзидан рейтинги анча юқори бўлган гроссмейстерларнинг 7 нафарини мағлуб этишни уддалади ва яна иккиси билан дуранг ўйнади. 

Блиц. Шахматчиларимизнинг эгаллаб турган ўринлари:

18. Муҳиддин Мадаминов (2333) - 8 очко

28. Жаҳонгир Воҳидов (2507) - 7,5 

46. Нодирбек Абдусатторов (2666) - 7

111. Нодирбек Якуббоев (2560) - 5,5

117. Жавоҳир Синдаров (2639) - 5,5

124. Шамсиддин Воҳидов (2597) - 5

138. Муҳаммадзоҳид Суяров (2217) - 5

159. Ҳумоюн Бегмуратов (2267) - 4

25. Умида Омонова (1978) - 5,5 очко 

55. Афруза Ҳамдамова (2018) - 4,5

65. Нафиса Мўминова (2258) - 4