Брендан Аллен бугунги ғалабасидан кейин Чимаев ва Дю Плессига "вызов" ташлади

Рейтингда тўққизинчи ўринни эгаллаб турган Аллен бугунги ишончли ғалабасидан сўнг, ўрта вазн тоифасида UFC чемпиони Хамзат Чимаев ёки ушбу вазннинг собиқ чемпиони Дрикус Дю Плесси билан жанг қилишга тайёрлигини айтди.

Риддер бугунги жангга UFC’даги тўртта жангдан иборат ғалабали серия билан чиққанди. Айнан у чемпионлик камари учун асосий даъвогар сифатида эътироф этилаётганди. Аммо Аллен иккинчи раундда ташаббусни ўз қўлига олди ва ғалабани ўз томонига оғдирди. Нидерландиялик 35 ёшли Риддер сўнгги бешинчи раундга чиқмади. 

"Уч ярим ҳафталик машғулот, буни дивандан туриб қилдим, - деди Риддерга қарши жангдан бош тортган Энтони Эрнандеснинг ўрнини эгаллаган Аллен. - Уч ярим ҳафта... Бошқалардан фарқ қилишимни айтгандим. Хотиржам бўлсам ва эътиборимни тўлиқ жангга қаратсам, мен дунёдаги энг яхшисиман". 

"Чимаев, сен яхши грепплерни рақиб сифатида кўрмоқчимисан? Ёш ва оч жангчини хоҳлайсанми? Кел ва уриниб кўр, - деди Аллен август ойида чемпионликни қўлга киритган ва тез орада биринчи чемпионлик ҳимоясини ўтказадиган Чимаевга. - Бўлмаса, Дрикус, сен қаердасан? Сен билан ҳам жанг қилмоқчиман".