02 дек 10:12
Янгиликлар

Теннис

Буэнос-Айрес (WTA 125). Маяр Шериф бош соврин соҳибаси

Аргентина пойтахти Буэнос-Айрес шаҳрида теннис бўйича WTA 125 тоифасига кирувчи турнир якунланди.

Финалгача WTA рейтингида роппа-роса 100-ўринни эгаллаб турган Маяр Шериф мусобақа бош совринини қўлга киритди. Мисрлик теннис маликаси финал учрашувида дунёнинг 57-ракеткаси польшалик Катаржина Кавани 6/3, 4/6, 6/4 ҳисобида таслим этди.

Шериф Кавага ноқулай рақиб бўлиб қолмоқда. Теннисчиларнинг ўзаро учрашувларидаги ҳисоб йириклашди - 3:0. Икки соату 28 дақиқа давом этган баҳсда Шериф 4 та эйс, 7 та брейк қайд этиб, 3 та қўшхатога йўл қўйди.

Қизиғи, бу Шерифнинг 2024 йилда қўлга киритган биринчи соврини бўлди. У Аргентина турниридаги муваффақиятли иштирокидан 125 рейтинг очкоси ҳамда 12,220 доллар мукофот пули ишлаб олди.