Бугун Абдусатторов пешқадамлик қилаётган турнирда блиц баҳслари бошланади

Вугар Гашимов хотирасига бағишлаб ўтказилаётган анъанавий мусобақада дунёнинг номдор 10 гроссмейстери қаторида рапид бўйича амалдаги жаҳон чемпиони, Бутунжаҳон шахмат олимпиадаси ғолиби Нодирбек Абдусатторов ҳам бош соврин учун дона суряпти.

Fairmont Baku меҳмонхонасида ўтаётган мусобақанинг дастлабки уч куни шахматчилар рапид йўналиши бўйича баҳслашишди ва якунда ҳамюртимиз энг яқин таъқибчисини 2 очкога ортда қолдирган ҳолда ғолибга айланди. Бугун Нодирбек блиц, яъни тезкор шахмат бўйича старт оладиган турнирдаги иштирокини испаниялик Франсиско Вальехога қарши баҳс билан бошлайди.  

Маълумот учун, Вугар Гашимов хотира турнири 2014 йилдан бери ўтказиб келинади. Илк мусобақа Вугар Гашимов туғилган Шамкирда ўтказилган. Амалдаги жаҳон тожи соҳиби Магнус Карлсен тўрт маротаба (2014, 2015, 2018, 2019) мусобақа ғолиби бўлди. Озарбайжонлик Шахрияр Мамедъяров икки бор (2016, 2017) чемпионлик шоҳсупасига кўтарилган. Америкалик Фабиано Каруана амалдаги (2021) чемпион ҳисобланади.