Бугун Нодирбек амалдаги жаҳон чемпиони Магнус Карлсенга қарши дона суради

Умумий мукофот жамғармаси 1 миллион долларни ташкил қилувчи ушбу нуфузли мусобақада ёш гроссмейстерларимиз Нодирбек Абдусатторов, Жавоҳир Синдаров, Шамсиддин Воҳидов ва Жаҳонгир Воҳидов ўз маҳоратларини намойиш этишяпти. 

Эътиборга молик жиҳати шундаки, 17 ёшли гроссмейстеримиз Нодирбек Абдусатторов 9-турдан сўнг 7 очко жамғарган ҳолда қўшимча коэфицентларга кўра иккинчи ўринни эгаллаб турибди. Нодирбекдан ярим очко кўп жамғарган амалдаги жаҳон чемпиони, норвегиялик гроссмейстер Магнус Карлсен чемпионатда пешқадамлик қиляпти. 

Бугун 10-турда Нодирбек Абдусатторов (2593) оқ доналарда Магнус Карлсен (2842)га қарши баҳс олиб боради. Кеча Нодирбек қора доналарда ўйнашига қарамай, исроиллик машҳур гроссмейтер Борис Гельфандни мағлубиятга учратди. Карлсен эса оқ доналарда польшалик Ян Дудадан устун келди. 

Тўққизинчи турда Жаҳонгир Воҳидов оқ доналарда ҳиндистонлик Аржун Еригайси билан дуранг ўйнади. Шамсиддин Воҳидов қора доналарда польшалик Жимон Гумуларзга, Жавоҳир Синдаров россиялик Михаил Антиповга ютқазиб қўйди.