Бугун пешқадам Абдусатторов яна 3 та партияда дона суради

Вугар Гашимов хотирасига бағишлаб ўтказилаётган анъанавий мусобақада дунёнинг номдор 10 гроссмейстерлари қаторида рапид бўйича амалдаги жаҳон чемпиони, Бутунжаҳон шахмат олимпиадаси ғолиби Нодирбек Абдусатторов ҳам бош соврин учун дона суряпти.

Fairmont Baku меҳмонхонасида ўтаётган мусобақанинг биринчи кунги баҳсларидан сўнг 3 та партиянинг барчасида ғалаба қозонган Абдусатторов 6 очко билан якка пешқадам бўлиб турибди. Бугун Нодирбек яна 3 та партияда номдор гроссмейстерларга қарши баҳс олиб боради. 

Ҳамюртимиз иштирокидаги бугунги ўйинлар:

4-тур. Абдулла Гадимбайли (Озарбайжон) - Нодирбек Абдусатторов

5-тур. Нодирбек Абдусатторов - Ванг Хао (Хитой)

6-тур. Сэм Шенкленд (АҚШ) - Нодирбек Абдусатторов

Маълумот учун, Вугар Гашимов хотира турнири 2014 йилдан бери ўтказиб келинади. Илк мусобақа Вугар Гашимов туғилган Шамкирда ўтказилган. Амалдаги жаҳон тожи соҳиби Магнус Карлсен тўрт маротаба (2014, 2015, 2018, 2019) мусобақа ғолиби бўлди. Озарбайжонлик Шахрияр Мамедъяров икки бор (2016, 2017) чемпионлик шоҳсупасига кўтарилган. Америкалик Фабиано Каруана амалдаги (2021) чемпион ҳисобланади.