Бугун Қосимжонов амалдаги жаҳон чемпиони - Магнус Карлсенга қарши дона суради

Мусобақада амалдаги жаҳон чемпиони норвегиялик Магнус Карлсен, жаҳон вице-чемпионлари Вишванатан Ананд (Ҳиндистон), Фабион Каруана  (АҚШ), Сергей Карякин (Россия) каби машҳур шахматчилар дона суришяпти. 

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Эътиборга молик жиҳати шундаки, бугун мусобақанинг 3-турида Рустам Қосимжонов амалдаги жаҳон чемпиони, норвегиялик Магнус Карлсенга қарши дона суради. Ушбу баҳсда Қосимжонов қора доналарда ҳаракат қилади. Ҳар икки жаҳон чемпиони 2 имкониятдан 1,5 очко жамғаришган. 

Нодирбек Абдусатторов эса бугун қора доналарда россиялик халқаро гроссмейстер Владимир Федосеевга қарши баҳс олиб боради. Турнирда 106-рақамда сараланган Нодирбек 2-турдан сўнг турнир жадвалида 1,5 очко билан қўшимча кўрсаткичларга кўра 16-ўринни эгаллаб турибди. Олтинчи поғонадаги россиялик гроссмейстер Алексей Саранада ҳам 1,5 очко бор.

Маълумот учун, 22 октябрь куни якунига етадиган Grand Swiss турнири ғолиби 70 000, иккинчи ўрин соҳиби 50 000, учинчи ўрин эгаси эса 40 000 АҚШ доллари миқдоридаги мукофот пулига эга бўлади. Кучли ўттизликка кира олган шахматчига эса 2000 АҚШ доллари тақдим этилади.