Бугун Шарқ гавҳари - Самарқандда замонавий дзюдо зали фойдаланишга топширилади + ФОТО

Шу мақсадда Ўзбекистон дзюдо федерацияси кенг кўламдаги ишларни бошлаб юборганди. Биринчи қадам сифатида Ўзбекистон дзюдо федерацияси ҳудудида жуда қисқа фурсатда ана шундай енгил конструкцияли машғулот зали бунёд этилган ва фойдаланишга топширилди. Пойтахтда бошланган хайрли иш энди республикага кўчди ва айни пайтга келиб бутун Ўзбекистонни қамраб олди. Ҳозирда Қорақалпоғистон Республикаси ҳамда қолган барча вилоятларда енгил конструкцияли дзюдо заллари жадал суратларда бунёд этиляпти.    

Бугун ана шундай спорт объектларидан бири қадим ва ҳамина навқирон Самарқанд шаҳрида фойдаланишга топширилади. Шаҳарнинг 7-умумтаълим мактаби ҳудудида бунёд этилган ушбу замонавий дзюдо зали маҳаллий ёшлар учун ажойиб совға бўлади. Бугун бироздан сўнг Ўзбекистон Халқ таълими вазирлиги, мамлакат дзюдо федерацияси ҳамда «Falcon Hunting Solutions» компанияси ҳамкорлигида бунёд этилган ушбу дзюдо залининг тантанали очилиш маросими бўлиб ўтади. 

Қўшма лойиҳага кўра, мамлакатимизнинг аҳолиси энг зич жойлашган ҳудудларидаги жами 15 та мактабда худди шундай ихтисослаштирилган дзюдо заллари бунёд этилади. Уларнинг аксариятида бугунги кунда қурилиш ишлари олиб бориляпти. Босқичма-босқич фойдаланишга топширилади. Ушбу дзюдо залларида жами 28 000 ўқувчи ва 70 000 нафардан зиёд болалар дзюдо сир-асрорларини ўрганишади.