Дана Уайт ва Эдди Хирн ўзаро бокс жанги ўтказмоқчи

Ушбу мавзуга биринчи бўлиб Пирс Морганга берган интервьюсида Хирнга қарши эҳтимолий бокс жанги ҳақидаги саволга ижобий жавоб берган Уайт тўхталди.

"Менга қаранг, агар Эдди бокс қоидалари асосида жанг қилишни хоҳласа, биз бунга тайёрмиз. Лекин у буни хоҳлайди, деб ўйламайман. Олдин жиддий йигитлар билан бокс қоидалари асосида жанг қилардим - боксчилар билан ҳам, UFC жангчилари билан ҳам. Мен бокс билан шуғулланганман", - дейди Уайт.

Хирннинг жавоби iFL TV телеканалига берган интервьюсида янгради.

"Мен ҳамиша промоутерлар билан жангларга "ҳа" деганман, чунки ғалаба қозонишимни биламан. Дананинг спарринг қилаётганини кўрганман ва албатта шундан келиб чиқиб бу жангга рози бўлардим. Қандай қилиб "йўқ" дейиш мумкин? Унда қўрқоққа ўхшаб қолардинг, тўғрими? Бундан ташқари, Netflix бу учун катта пул тўлаган бўларди ёки жангни DAZN, глобал бокс уйида жонли эфирда кўрсатиш мумкин бўлар эди. Демак, мен бу жанг учун катта пул ишлаб топаман. Тўғрисини айтсам, уни ўзим "чопиб" ташлайман", - деб жавоб берди Хирн.

Икки таниқли промоутер ўртасидаги зиддият Уайт Matchroom Boxing компаниясидан бокс юлдузи Конор Бенни олиб кетганидан сўнг янги босқичга кўтарилди. Бунга жавобан Хирн оғир вазн тоифасида амалдаги UFC чемпиони Том Аспиналл билан агентлик шартномасини имзолади ва британияликнинг ташкилотдаги молиявий аҳволини яхшилашга ваъда берди.