Дуатлон усталари баҳс юритишди

Урганч бирлашган техника мактабининг ўқув-машғулот базасида уюштирилган мазкур мусобақада Хоразм воҳасининг шаҳар ва туманлари, шунингдек, Қорақалпоғистон Республикасининг Нукус автомобиль мактаби, Кегейли ва Тўрткўл туманларининг ўқув спорт техника клубларининг дуатлончилари югуриш-велосипед пойгаси-югуриш машқини бажаришда ўзаро беллашишди.

Якуний сарҳисобларга кўра, 1999-2001 йилларда туғилган ёшлар ўртасидаги биринчиликнинг қизлар баҳсида Урганч бирлашган техника мактаби аъзоси Дилафруз Сайидова, ўғиллар орасида Гурлан тумани вакили Мансурбек Отахонов шоҳсупанинг биринчи поғонасини эгаллади. Ушбу ёш тоифасида Гурлан туманидан Зумрад Ўрозметова, Хонқа туманидан Дилфуза Исмоилова, Урганч бирлашган техника мактабидан Сулаймон Одамбоев, Тўрткўл туманидан Бекмурод Тангрибергановлар совриндор бўлишди.   Кичик ёшдаги, яъни 2002-2004 йилларда туғилган ўсмирлар орасида Урганч бирлашган техника мактабининг яна бир  спортчиси Маҳлиё Худойберганова  ва Гурлан тумани дуатлон устаси Аброр Нориманов биринчи ўринга кўтарилди. Мазкур ёш тоифасида гурланлик Шаҳзода Ўрозметова, тўрткўллик Камола Кўпалова, Урганч бирлашган техника мактабидан Диёрбек Ибодуллаев ва хонқалик Миржалол Кенжаевлар фахрли ўринлардан жой олишди.

Ўз навбатида Ўзбекистон мудофаасига кўмаклашувчи  “Ватанпарвар” ташкилоти Хоразм вилояти кенгаши раиси ўринбосари - вилоят техник ва амалий спорт турлари маркази директори Одилбек Ибрагимов  ғолиб ва совриндорларни эришган ютуқлари билан қутлади. Ҳайъати эътирофига сазовор бўлган спортчилар диплом ва совғалар билан тақдирланишди.

Эндиликда, энг яхши кўрсаткичга эришган хоразмлик дуатлончилардан иборат вилоят терма жамоаси жорий йилнинг 20-22 апрель кунлари Термиз шаҳрида бўлиб ўтадиган Ўзбекистон чемпионатида  воҳа шарафини ҳимоя қилишади.

Икром ХУДОЙБЕРГАНОВ