Дунёнинг собиқ биринчи ракеткаси Тошкентдаги халқаро турнир меҳмони бўлади (ФОТО)

Турнир доирасида 24 октябрь куни соат 14:00 да 10 ёшгача бўлган болалар учун махсус мастер-класс ташкил этилади. Тадбирни дунёнинг собиқ биринчи ракеткаси Динара Сафина ўтказади.

2009 йилда дунёнинг биринчи ракеткаси бўлган, Россия фахрий спорт устаси ва ҳозирда теннис шарҳловчиси сифатида фаолият юритаётган Динара Сафина ёш иштирокчилар билан ўз тажрибасини бўлишади.

Динара Сафина — жуфтлик баҳсларида “Катта Дубулға” турнири ғолиби (АҚШ Очиқ чемпионати – 2007), яккалик баҳсларида уч карра “Катта Дубулға” финалчиси, шунингдек, жуфтлик баҳсларида яна бир марта “Катта Дубулға” финалчиси (АҚШ Очиқ чемпионати – 2006).

У Олимпия ўйинларининг яккалик баҳсларида кумуш медаль совриндори, WТА туркумидаги 21 та турнир ғолиби (шундан 12 таси яккалик баҳсларида), икки карра Билли Жин Кинг кубоги (2005, 2008) соҳибаси, шунингдек, 2009 йилда Россия терма жамоаси таркибида Хофманн Кубоги финалчиси бўлган. Сафина жуфтлик баҳсларида дунёнинг собиқ саккизинчи ракеткаси ҳисобланади.

У — 2000 йилда дунёнинг биринчи ракеткаси бўлган россиялик теннисчи Марат Сафиннинг синглисидир.

Мастер-классдан сўнг автограф-сессия ва матбуот анжумани ўтказилади.