Дзюдо бўйича Олимпиада лицензиантлари ва уларнинг мураббийлари тақдирланди + ФОТО

Тадбирда Ўзбекистон Республикаси Президенти маслаҳатчиси А.Абдуваҳитов, Ўзбекистон Республикаси Бош вазири ўринбосари – туризм ва спорт вазири Азиз Абдуҳакимов, федерация мутасаддилари, дзюдочилар, уларнинг ота оналари, мураббийлар ҳамда оммавий ахборот воситалари ходимлари иштирок этди. 

Дастлаб Ўзбекистон Республикаси Президенти маслаҳатчиси А.Абдуваҳитов дзюдо бўйича Ўзбекистон терма жамоаси аъзоси Гулноза Матниёзовани мукофотлаш тўғрисидаги Президент Фармонини ўқиб эшиттирди ҳамда юксак давлат мукофоти - «Шуҳрат» медалини спортчимизга топширди.

Тантанали маросимда XXXII ёзги олимпия ўйинларининг 10 нафар (7 эркак, 3 аёл) литсензианти ҳамда уларнинг мураббийларига бир марталик пул мукофотлари топширилди. Дзюдочилар 100 млн, уларнинг мураббийлари 50 млн сўмлик сертификатларни қабул қилиб олишди. Дзюдочилар номидан сўзга чиққан Давлат Бобонов, Гулноза Матниязова, терма жамоа мураббийи Ўктам Раҳмонов билдирилган юксак ишончни оқлаш учун Олимпиадада бор имкониятларини ишга солишга ваъда беришди.     

Маълумот учун, Ўзбекистон дзюдоси тарихида илк бор терма жамоамизнинг 10 нафар аъзоси Олимпиадада юртимиз шарафини ҳимоя қилади. Шунингдек, жамоавий микст баҳсларида ҳам илк бор иштирок этамиз. Терма жамоамиз делегацияси эртага Япониянинг Майдзуру шаҳрига жўнаб кетади. Олимпиадага тайёргарликнинг сўнгги босқичи айнан Кунчиқар юртда ўтказилади. 

Ўзбекистон дзюдо федерацияси матбуот хизмати