Элмурат Тасмурадов ва Мўминжон Абдуллаев учун Олимпиада медалсиз якунланди

Бироз аввал юнон-рум кураши бўйича 60 кг вазн тоифасида ярим финал жанги якунланди. Афсус, бу беллашув биз учун қониқарсиз натижа билан тугади. Асли Олмалиқда туғилган, бир неча йилдан бери Украина шарафини ҳимоя қилаётган Ленур Темиров япониялик жаҳон чемпиони Кеничиро Фумитага имкониятни бой берди. 

Агар Темиров бу баҳсда зафар қучганида, Елмурат Тасмурадов бронза медали йўлидаги ўтиш учрашувида гиламга чиқар эди. Рио-2016 Олимпиадасининг бронза медали совриндори бўлган ҳамюртимиз нимчорак финалда айнан Ленур Темировга 0-5 ҳисобида ютқазиб қўйганди. 

130 кг вазндаги беллашувларида юртимиз шарафини ҳимоя қилаётган Мўминжон Абдуллаевни чорак финалда мағлуб (0:2) этган чилилик Акоста Фарна Олимпиаданинг финалига йўл ола билмади. У ярим финалда грузиялик Каджаяга ютқазиб қўйди. 

Сўнгги бални қўлга киритиб, ҳисобни тенглаштирган гуржистонлик полвон финалга йўл олиш баробарида камида Олимпиаданинг кумуш медалини нақд қилди. Агар чилилик курашчи ғалаба қозонганида Мўминжон Абдуллаев учун бронза медалига курашиш имконияти юзага келарди.