Энди "Муҳими натижа эмас - иштирок" шиори остида мусобақаларга борилмайди

Йиғилишни Миллий олимпия қўмитаси бош котиби Жасур Матчанов ва биринчи вице-президент Ойбек Қосимовлар олиб бордилар. Унда бош котиб федерация вакилларининг Осиё ўйинлари учун режалари билан танишди.

Аввалги йилларда ўтказилган Осиё ўйинларида қайд этилган натижалар таҳлил қилинди. Август ойида Индонезияда бўладиган Осиё ўйинларига тайёргарлик жараёни, мусобақага бориш талаблари бошқача бўлиши, аввалги натижалар яхшиланиши лозимлиги алоҳида қайд этиб ўтилди. 

Йиғилиш давомида Олимпия спорт турлари федерациялари вакилларининг хар бири билан ютуқ ва камчиликлар муҳокама қилинди. МОҚ Бош котиби федерациялар таклифини кутишини, селекцияларни кучайтириш, ресурслардан самарали фойдаланиш, ўқув-машғулот йиғинларига алоҳида эътибор берилишини таъкидлаб ўтди. Олимпия қўмитаси федерацияларга хар қандай ёрдам қўлини чўзишга тайёр эканлигини маълум қилинди. 

"Биз аввалги йилларда ўтказилган Осиё ўйинларида қайд этилган натижаларни кўриб, таҳлил қилиб чиқдик. Индонезиядаги ўйинларга 6 ой вақт қолди. Шу муносабат билан биз янги режалар тузяпмиз. Шуни маълум қилишни истардимки, бизга сон эмас, сифат керак. "Муҳими натижа эмас - иштирок" шиори остида ўйинларда қатнашмаймиз. Аксинча, натижаларни янада яхшилаш устида иш олиб борамиз ва бутун Осиёга ўзбек спортининг бугунги салоҳиятини намойиш этамиз", - деди Жасур Матчонов йиғилиш вақтида.

Маълумот учун, XVIII Осиё ўйинлари 18 август - 2 сентябрь кунлари Индонезиянинг Жакарта ва Плембанг шаҳарларида ўтказилади. Ушбу ўйинларда Ўзбекистон  делегацияси катта таркиб билан иштирок этиши кутиляпти.