Федерация раҳбарияти дзюдочилар билан учрашди ФОТОРЕПОРТАЖ

Ўзбекистон эркаклар терма жамоаси 21-30 июнь кунлари Анталия, Нелля Киямова мураббийлигидаги қизларимиз эса айнан шу саналарда Словакияда йиғин ўтказишади. Кейин 1-7 июль кунлари Хорватияда ҳар икки терма жамоамиз учун навбатдаги ўқув-машғулот йиғини ташкил этилади. Олимпиадага сўнгги тайёргарлик эса 11-19 июль саналарида бевосита Япония (Майдзуру) давлатида ўтказилади. 

Терма жамоамиз делегацияси сафарга жўнаб кетиш олдидан Ўзбекистон дзюдо федерациясида йиғилиш ўтказилди. Унда Ўзбекистон Миллий олимпия қўмитаси раиси ўринбосари, мамлакат дзюдо федерацияси раиси Азизжон Камилов, раис ўринбосарлари Алишер Нарбаев, Зафар Мамажонов, терма жамоа бош мураббийи Илиас Илиадис, дзююдочилар ва уларнинг шахсий мураббийлари иштирок этди. 

Федерация раҳбарияти олдинда турган учта хориж йиғинининг дзюдочиларимиз учун қандай аҳамиятга эга экани, катта масъулият ва талабчанлик билан ёндашиш лозимлигини уқтиришди. Шу билан бирга кутилмаган жароҳатлардан сақланиш кераклиги ҳам айтилди.  

Ўз ўрнида бош мураббий ҳамда дзюдочилар давлатимиз раҳбари ва халқимиз билдираётган ишонч, улар кутаётган натижани қайд этиш учун бор имкониятларини ишга солишларини таъкидладилар.