ФИДЕга аъзо мамлакатлар сони 200га яқинлашмоқда

Халқаро шахмат федерацияси (FIDE) президенти Aркадий Дворкович бир йил ичида 200 мамлакат ушбу ташкилотга аъзо бўлишига умид билдирди. У бу ҳақда Халқаро шахмат кунига бағишланган FIDE ва БМТнинг «Соғломлаштириш учун шахмат» онлайн-тадбирида айтиб ўтди.

Халқаро шахмат куни 1966 йилдан бери ҳар йили 20 июлда нишонланиб келинмоқда. 1924 йил шу куни FIDE ташкил этилган.

«FIDE 96 ёшда, шу сабабдан биз энди ёш эмасмиз, – деди Дворкович.«Биз аллақачон баркамол ва кучлимиз. Айни пайтда биз 195 та миллий шахмат федерациясини бирлаштирамиз, яъни 200 га яқинлашиб қолдик. Аминманки, келаси йилнинг июль ойида – кейинги туғилган кунимизни нишонлаётган пайтда сафимизда кўпчилик бўлади».

«Aммо бу шунчаки рақамлар эмас. Унинг ортида бутун дунё бўйлаб шахматни севадиган минглаб ва миллионлаб одамлар турибди. Шахмат ўйини одамларга қувонч бағишлайди, уларнинг ақл-идрокини ривожлантиради, уларга янги кўникмаларни, жумладан мантиқий фикрлашни ривожлантиришга имкон беради, бу эса унинг атрофида бўлаётган нарсаларни таҳлил қилишга имкон беради», – дея қўшимча қилди у.

Дворкович ўз нутқи давомида шахматни мактаб ўқув дастурига киритишнинг муҳимлигини таъкидлади.