Фрэнсис Нганну залга қайтди: "Ҳаммасига тайёрман!"

Бу ҳақда камерунлик аралаш яккакураш устасининг ўзи ижтимоий тармоқдаги саҳифалари орқали хабар берди. У машғулотдан сурат жойлаб, унинг остида изоҳ ҳам ёзиб қолдирган. 

"Ҳаёт баъзан бизни секинлаштиради ва йўлдан оздиради, юксалишимизни тўхтатишга ҳаракат қилади. Аммо шуни ҳеч қачон унутмангки, садоқат, қатъият ва интизом - сенинг биринчи иттифоқчиларингдир ва улар сени ҳеч қачон алдашмайди. Мен залга қайтдим ва ўзимни ҳар қачонгидан ҳам ғайратлироқ ҳис қиляпман. Рўй бериши мумкин бўлган ҳамма нарсага тайёрланяпман", - деб ёзган "Йиртқич".

Ҳозирча Нганнунинг кейинги рақиби айнан ким бўлиши, жанг қайси лигада ўтказилиши номаълум. Аввалроқ камерунликнинг оғир вазн тоифасида собиқ жаҳон чемпиони Деонтей Уайлдер билан эҳтимолий жанги, сайёрамизнинг энг яхши кикбоксчиларидан бири Рико Верховенга қарши трилогиядан иборат жанглари ҳақида маълумот берилганди. Яқинда PFL лигаси раҳбарлари ташкилотнинг келаси йили Оқ уйда бўлиб ўтадиган турнирда эҳтимолий иштирокини муҳокама қилиш доирасида унинг Вадим Немковга қарши жангини тилга олишганди.