Фурқатбек Ёқубов: "Дана, менга локация ташла, манзилнинг аҳамияти йўқ!" (+ВИДЕО)

"Мен кикбоксинг бўйича уч карра жаҳон чемпиониман. Ҳозирда ММАда ўз жангларимни ўтказиб келяпман. Чейл Соннен жамоаси таркибида The Ultimate Fighter 33 шоусида иштирок этдим. Ҳозир ўзимни жуда яхши ҳис қиляпман. Мик Мейнард (UFC матчмейкери), Дана Уайт, мен UFC`да жанг қилишга тайёрман. Менга локация ташласангиз кифоя. Абу-Дабидаги турнир бўладими ёки бошқаси, мен октагонга чиқишга шайман. Менга имконият беринг", - дея мурожаат қилган Фурқатбек Ёқубов. 

Ҳамюртимиз яқинда The Ultimate Fighter 33 шоуси доирасида Чейл Соннен жамоаси таркибида Даниэль Кормьенинг жамоасидаги қозоғистонлик Алиби Идирисга очколар ҳисобига кўра имкониятни бой бериб қўйганди. Алиби ушбу шоудаги иштироки сабаб UFC`дан жанг олганди. Унинг дебюти 17 август куни UFC 319 турнири доирасида Жозеф Моралесга қарши бўлиб ўтди ва иккинчи раундда рақиби томонидан бўғиб қўйилди. Мағлубиятга қарамай, UFC раҳбарлари Идрис билан яна 4 та жанг учун шартнома имзолашди.    

Маълумот учун, 30 ёшли Фурқатбек Ёқубов ММАдаги фаолияти давомида 19 та жанг ўтказиб, 15 та ғалаба ва 4 та мағлубият қайд этган.