Grand Swiss. Ниҳоят, Рустам Қосимжонов ғалаба қозонди ва чемпионлик пойгасига қўшилди

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Кеча ўтказилган 8-партияда Рустам Қосимжонов ниҳоят ғалаба қозонишга муваффақ бўлди. Ҳамюртимиз қора доналарда ҳаракат қилганига қарамай, ўзи сингари 4 очко жамғариб турган ҳиндистонлик халқаро гроссмейстер Пураник Абхиманюни мағлубиятга учратди. 

Ушбу муҳим ғалабадан сўнг Қосимжонов ўз очколарини 5 тага етказиб олди ва чемпионлик пойгасига қўшилди. У турнир жадвалида қўшимча кўрсаткичларга кўра 32-поғонадан 17-ўринга кўтарилиб олди. Рустам Қосимжонов бугун ўтказиладиган 9-турда оқ доналарда британиялик гроссмейстер Дэвид Хоуэлга қарши баҳс олиб боради. 

Маълумот учун, 22 октябрь куни якунига етадиган Grand Swiss турнири ғолиби 70 000, иккинчи ўрин соҳиби 50 000, учинчи ўрин эгаси эса 40 000 АҚШ доллари миқдоридаги мукофот пулига эга бўлади. Кучли ўттизликка кира олган шахматчига эса 2000 АҚШ доллари тақдим этилади.