Grand Swiss. Рустам Қосимжоновда ғалаба, 15 ёшли гроссмейстеримизда дуранг!

Мусобақада амалдаги жаҳон чемпиони норвегиялик Магнус Карлсен, жаҳон вице-чемпионлари Вишванатан Ананд (Ҳиндистон), Фабион Каруана  (АҚШ), Сергей Карякин (Россия) каби машҳур шахматчилар дона суришяпти. 

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Рустам Қосимжонов иккинчи турда оқ доналарда хитойлик Тинг Жие Лей (2469)га қарши баҳс олиб борди ва 27-юришдан сўнг рақибини мағлубиятга учратди. Нодирбек Абдусатторов эса россиялик халқаро гроссмейстер Антон Демченко (2655) билан муросага келди. Биринчи турда аксинча Қосимжонов дуранг ўйнаган, Абдусатторов ғалабага эришганди. 

Маълумот учун, 22 октябрь куни якунига етадиган Grand Swiss турнири ғолиби 70 000, иккинчи ўрин соҳиби 50 000, учинчи ўрин эгаси эса 40 000 АҚШ доллари миқдоридаги мукофот пулига эга бўлади. Кучли ўттизликка кира олган шахматчига эса 2000 АҚШ доллари тақдим этилади.