Ҳакамлар аттестациядан ўтказилди ФОТОРЕПОРТАЖ

Қорақалпоғистон Республикаси, Тошкент шаҳри ва 10 та вилоятдан жами 29 (25 эркак, 4 аёл) нафар ҳакам рўйхатдан ўтган бўлиб, уларнинг бари пойтахтда жам бўлишди. Фақат Наманган ва Фарғона вилоятини ҳисобга олмаганда, барча ҳудудлардан ушбу аттестацияга ҳакамлар етиб келишди. 

Кеча ўтказилган аттестациянинг биринчи босқичида ҳакамлар халқаро қоидалар ҳамда мусобақаларда ишлатиладиган япон терминологияси бўйича имтиҳон топширишди. Куннинг иккинчи ярмида татамида амалий машғулот ўтказилди. Ҳар бир ҳакам билет танлаш орқали япон тилидаги усулларни амалий тарзда кўрсатиб беришди. 

Аттестацияда қатнашган 29 ҳакамдан 22 нафари имтиҳонни муваффақиятли топширди, уларга махсус сертификатлар тақдим этилди. Энди улар Ўзбекистон чемпионатида ҳакамлик қилишади. Айнан мамлакат чемпионати аттестациянинг иккинчи босқич вазифасини ўтаб беради. Унда ҳакамларнинг бевосита татамидаги ишига баҳо берилади. 

Ўзбекистон чемпионати якунида 15 нафар ҳакам саралаб олинади. Бу реферилар барча ёш тоифасидаги мамлакат биринчиликларида ҳакамлик қилиш ҳуқуқини қўлга киритадилар. Федерация ҳакамлар орасидан энг истеъдодлиларини IJF академиясидаги ўқишга тайёрлаб боради.