Ҳамюртларимизнинг 4 нафарида ғалаба, Афруза медал олишга яқин

8, 10 ҳамда 12 ёшли шахматчилар ўртасида ташкил этилаётган жаҳон чемпионатида дунёнинг 100га яқин мамлакатидан истеъдодли шахматчилар иштирок этяпти.

Эътиборлиси, жаҳон чемпионатида қатнашаётган олти шахматчимиздан тўрт нафари бу турда ғалаба нашидасини сурди. Саккиз ёшлилар мусобақасида ўз имкониятини синаб кўраётган Ҳумоюн Бекмуродов 10-турда қозоғистонлик Амир Калиевни мағлубиятга учратиб, очколарини 6тага етказиб олди.

Ўн ёшли шахматчилар баҳсида биринчи рақам остида таснифланган Исломбек Синдоров эса АҚШ вакили Адриан Кондаковни енга олмади. Учрашув дуранг натижа билан якунланди.

Ўн икки ёшли шахматчилар мусобақасида иккинчи тартиб рақамли иштирокчи бўлиб турган Жавоҳир Синдоров эса украиналик Владислав Ларкиндан устун келди. Жавоҳирнинг очколари 7тага етди.

Жаҳон чемпионати кашфиётига айланган Афруза Ҳамдамова бу турда яна ғалаба нашидасини сурди. У қора доналарда ўйнашига қарамай, рейтингда ўзидан анча юқорида турган озарбойжонлик шахматчи Лейла Буданговани мағлуб этди.

Афруза сўнгги тур олдидан 7,5 очко билан учинчи ўринни эгаллаб турибди. Бугун у 8,5 очко билан биринчи поғонадан жой олган қозоғистонлик Айша Закировага қарши дона суради. Агар ғалаба қозонса, совринли ўринлардан бирини аниқ қўлга киритади.  

Ҳамюртларимиздан Юлия Хегай арманистонлик Астгик Хакопянга ютқазиб қўйди. Мафтуна Бобомуродова эса аксинча қора доналарда ҳаракат қилиб, АҚШ вакиласи Нура Баалладан устун эканлигини амалда исботлади.