Ҳумоюн Султонов жароҳати, бўлажак ўйин, Ҳуркач ва кейинги режалари ҳақида гапирди

Ушбу ўйинлар олдидан мамлакатимизнинг биринчи ракеткаси Ҳумоюн Султонов Olamsport.com мухбири билан суҳбатда ўз фикрлари билан ўртоқлашди.

- Терма жамоамизнинг ўйин учун тайёргарлик жараёнлари ҳақида нима дея оласиз?

"Бу сафарги рақибимиз Польша терма жамоаси, бу жуда ҳам кучли терма жамоалардан бири. Жумладан, Ҳуберт Ҳуркач дунё рейтингида саккизинчи, Касниковски эса 270-ўринни эгаллаб турибди. Бундан ташқари, рейтингда аввал юзталикка кирган тажрибали теннисчиси бор. Жуфтликдаги теннисчиларида ҳам бири 17, яна бири 130-ўринда турадиган кучли жамоа. Лекин биз тайёргарликни ўн кун олдин бошладик. Шахсан ўзим, йиғинга келишдан олдин бир қанча мусобақаларда ўйнаб келдим. Ғалаба учун қўллан келганча тайёргарлик кўряпмиз".

- Охирги мусобақаларда жуда ҳам формага кириб бордингиз. Лекин Olamsport.com сайтига сўнгги турнирда жароҳат олганингиз ҳақида маълум қилган эдингиз? Ҳозирги ҳолатингиз қандай?

"Терма жамоамизда бир нафардан шифокор, массаж устаси ва физотерпавепт бор. Улар ўз ишининг усталари ва 10 кун давомида мени турли ҳил муолажалар билан ўйинга тайёр ҳолга келтиришди. Ўйинга тайёрман. 100 фоиз жароҳатдан фориғ бўлдим, дея олмайман, аммо жароҳат ўйинда иштирок этишимга ҳалақит бермайди".

- Польша терма жамоаси таркиби, жумладан Ҳуберт Ҳуркач ҳақида қандай фикрдасиз?

"Топ ўйинчи. Охирги йиллар давомидаги энг яхши ўйинчилардан бири. Чунки унинг бўйи баланд. Ҳозирда эйс зарбаларини йўллаш бўйича ҳам дунёда биринчи рақамли. Лекин ҳаракат қиламиз, имконият ҳар доим бор. Ким рақиблик қилишидан қатъий назар, ҳар доим имконият бўлади".

- "Дэвис кубоги"дан кейинги режаларингиз қандай?

"Дэвис кубоги"дан кейин 12 февраль куни Португалияга учиб кетаман. У ерда иккита турнирда иштирок этиб қайтаман. Яқин орадаги режалар шу", - деди Султонов Olamsport.com мухбири Диёрбек Мавлонов билан суҳбатда.