IJF расмийлари Тошкентда

Шу кунгача Тошкент шаҳрида узлуксиз етти йил давомида Гран-При турнири ўтказиб келинган эди. Ўтган йили «Ҳумо» аренада юқори савияда ташкил этилган мусобақадан кейин Халқаро дзюдо федерацияси (IJF) пойтахтимизга «Катта Дубулға» турнири билан бирга катталар ўртасидаги Жаҳон чемпионати (2022) мезбонлигини ҳам топширганди.

Бугун IJF Мусобақаларни ўтказиш бўлими менежери Лиза Алан амалий ташриф билан пойтахтимизга етиб келди. Лиза хонимни Ислом Каримов номидаги Тошкент халқаро аэропортида Ўзбекистон дзюдо федерацияси раис ўринбосари Шоатхам Исроилов ҳамда Халқаро дзюдо федерациясида фаолият юритаётган тажрибали мутахассисимиз Абдулла Муродов кутиб олди. Лиза Алан ташриф давомида «Катта Дубулға» турнирига кўрилаётган тайёргарлик, мусобақа ўтказилувчи «Ҳумо» арена ҳамда ташкилий масалалар билан яқиндан танишади ва ўз тавсияларини беради. 

«Биз Ўзбекистонда спортга ҳукумат даражасида эътибор қаратилиши ва бунинг натижасида ҳар қандай нуфуздаги халқаро мусобақа юқори савияда ўтказилишидан хабардормиз. Бежизга Тошкент шаҳрига «Катта Дубулға» турнири ҳамда Жаҳон чемпионати мезбонлиги топширилмади. Ишончим комил, 5-7 март кунларига белгиланган мусобақамиз ҳам мавжуд талабларга мос равишда ўтказилади», - деди Л.Алан.

Маълумот учун, ҳозирда Ўзбекистон Жисмоний тарбия ва спорт вазирлиги, Миллий олимпия қўмитаси, мамлакат дзюдо федерацияси ҳамда қатор ҳамкор ташкилотлар вакилларидан иборат Ишчи ва Ташкилий гуруҳ «Катта Дубулға» турнирини юқори даражада ўтказиш йўлида иш олиб бормоқда.

Ўзбекистон дзюдо федерацияси матбуот хизмати