Икки юнон-рум курашчимиз Париж-2024 Олимпиадаси лицензияси учун гиламга чиқади

Бугун юнон-рум кураши бўйича Париж-2024 Олимпиадаси лицензиялари учун беллашувлар бўлиб ўтяпти. Бироз аввал саралаш баҳслари якунланиб, 1/2 финалда олимпия ўйинлари лицензиялари учун гиламга чиқадиган жуфтликлар аниқ бўлди. Классикларимиздан Жалгасбай Бердимуратов (87 кг) ва Рустам Ассакалов (97 кг) кечки дастурда Париж-2024 йўлланмалари учун курашишади. 

Осиё ўйинлари ғолиби бўлган Жалгасбай Бердимуратов 1/4 финалда ҳиндистонлик Кумар Сунилни 4-2 ҳисобида мағлубиятга учратди. Унинг Олимпиада чиптаси учун кечадиган 1/2 финалдаги рақиби эронлик Алиреза Моҳмадипиани бўлади. Алиреза 1/4 финалда қирғизистонлик Асан Жанишовдан 6-3 ҳисобида устун келди. 

Энг тажрибали юнон-рум курашчимиз Рустам Ассакалов эса 1/4 финалда япониялик Юри Наказатони 9-0 ҳисобида таслим этди. Энди у Олимпиада лицензияси учун мезбонлар вакили Жусупбековга қарши баҳс олиб боради. Жусупбеков 1/4 финалда ҳиндистонлик Нитешни муддатидан аввал 10-0 ҳисобида енгди.       

Қолган юнон-рум курашчиларимиз Аброр Атабаев (67 кг) 1/4 финалда қозоғистонлик Мейиржан Шермаханбетга 3-6, Тимур Насимов (130 кг) 1/4 финал баҳсида япониялик Сота Окумура 6-12 ҳисобида имкониятни бой бериб, мусобақадаги иштирокини эрта якунлади.

Лицензия учун кечадиган 1/2 финал жуфтликлари:

87 кг: Жалгасбай Бердимуратов - Алиреза Моҳмадипиани (Эрон)

97 кг: Рустам Ассакалов - Жусупбеков (Қирғизистон)

Ўтган йили Сербия пойтахти Белград шаҳрида ўтган жаҳон чемпионатида классикларимиздан Исломжон Баҳромов (-60 кг) ва Арам Варданян (-77 кг) Париж-2024 Олимпиадаси лицензиясини қўлга киритган эди.