20 мар 09:28
Янгиликлар

Теннис

Индиан-Уэллс аёллар турнири бош соврини Қозоғистонга кетди

АҚШнинг Индиан-Уэллс шаҳри мезбонлик қилган нуфузли "Мастерс" турнирининг аёллар ўртасидаги баҳсларида ҳам ғолиба номи аниқланди.

Мусобақанинг бош соврини учун жаҳоннинг 10-ракеткаси қозоғистонлик Елена Рибакина ҳамда WTA рейтингида 2-ўринни эгаллаб турган беларуслик Арина Соболенко кураш олиб борди.

Икки соату 6 дақиқа давом этган учрашувда Рибакина рақибасини 7/6(11), 6/4 ҳисобида мағлубиятга учратиб, фаолиятида илк бор WTA 1000 турнири ғолибасига айланди. Шунингдек, Рибакина Соболенкони илк марта мағлубиятга ҳам учратди. Ўзаро учрашувлардаги ҳисоб 4:1, Соболенко фойдасига.

Елена Рибакина турнирдаги муваффақиятли иштироки учун 1000 рейтинг очкоси ва 1,262,220 доллар мукофот пулига эга бўлди. Арина Соболенко эса 650 рейтинг очкоси ҳамда 662,360 доллар мукофот пули ишлаб олди.