WTA рейтинги янгиланди. Раҳимова яна Ўзбекистоннинг биринчи ракеткаси, қозоғистонлик теннисчи эса дунёнинг!

Икки ҳафталик АҚШ Очиқ чемпионати натижалари асосида янгиланган рейтингда Ўзбекистоннинг биринчи ракеткаси яна ўзгарди. Қисқа муддат биринчи рақамли теннис маликамиз бўлган Мария Тимофеева ўз ўрнини Камилла Раҳимовага бўшатиб берди. Ҳар икки теннисчимиз US Open 2026 турнирининг асосий тўрида нисбатан муваффақиятли иштирок этди. Мария иккинчи, Камилла эса учинчи даврага қадар етиб борди. Раҳимова 16 поғонага юқорилаб, 76-ўринга жойлашди. Тимофеева эса бир поғонага пастлаб, 87-ўринни эгаллаб турибди.     

Ўзбекистоннинг учинчи ракеткаси Полина Кудерметова 6 поғонага пастлаб, Топ-100`таликдан чиқиб кетди. Ҳамюртимиз АҚШ Очиқ чемпионати саралаш босқичининг 1/4 финалида чехиялик Линда Фрухвиртовага 1/6, 3/6 ҳисобида имкониятни бой берган эди. Тўртинчи ракеткамиз Лайма Владсон 12 поғонага кўтарилиб, 570-ўринга жойлашди. 

Теннисчиларимиз орасида энг катта кўтарилишга Дарья Шубина эришди. У 59 ўринга юқорилаб, ҳозирда 1467-ўринни эгаллаб турибди. Севиль Юлдашева бир поғона юқорилади. Қолган икки теннис маликамиз эса рейтингда пастлади. Милана Масленкова 81, Влада Якшибарова 43 поғона қуйига шўнғиди. 

Дунё теннисчиларининг Топ-10`талигида бир нечта аҳамиятга молик ўзгаришлар кузатилди. US Open 2026 финалида мусобақанинг амалдаги чемпиони Арина Соболенкони мағлубиятга учратган қозоғистонлик Елена Рибакина дунёнинг биринчи ракеткасига айланиб олди. Беларуслик теннисчи чемпионлик ва карвонбошиликни топширди ва иккинчи ўринга тушди. Украиналик Марта Костюк Топ-10`га қайтди. Каролина Мухова ва Ига Свёнтек ўзаро ўрин алмашиб олишди. 

WTA рейтинги. 14 cентябрь кунги ҳолат:

1 (2). Елена Рибакина (Қозоғистон) — 9901 очко

2 (1). Арина Соболенко (Беларусь) — 7875

3 (3). Жессика Пегула (АҚШ) — 7265

4 (4). Кори Гауфф (АҚШ) — 7244

5 (5). Мирра Андреева (Россия) — 5743

6 (6). Линда Носкова (Чехия) — 5328

7 (9). Элина Свитолина (Украина) — 4809

8 (7). Каролина Мухова (Чехия) — 4683

9 (8). Ига Свёнтек (Польша) — 4619

10 (11). Марта Костюк (Украина) — 3980…

Ўзбекистонлик теннисчиларнинг WTA рейтингидаги ўрни:

76 (92). Камилла Раҳимова – 912

87 (86). Мария Тимофеева – 873

103 (97). Полина Кудерметова – 728

570 (558). Лайма Владсон – 84

964 (965). Севиль Юлдашева – 26

1238 (1157). Милана Масленкова – 10 

1460 (1417). Влада Якшибарова – 4 

1467 (1526). Дарья Шубина – 4