Таниқли боксчи Эдгар Берланга Флоридада ҳибсга олинди

Америкалик боксчи Эдгар Берланга Флоридада икки ҳолат бўйича тан жароҳати етказишда айбланиб ҳибсга олинди.

Boxing Scene маълумотига кўра, айби судда исботланса, унга 15 йилгача озодликдан маҳрум қилиш жазоси тайинланиши мумкин. 29 ёшли боксчи 26 октябрь куни Лейкленд полицияси томонидан қўлга олинган. Айбловлар 18 октябрь куни содир бўлгани айтилаётган ҳодиса билан боғлиқ. 

Тергов маълумотларига кўра, Берланга оғирлаштирувчи ҳолатларда оғир тан жароҳати етказганликда айбланмоқда. Сешанба куни ўтказилган суд мажлисида унинг гаров пули 16 минг доллар этиб белгиланди.

Иш бўйича дастлабки суд мажлиси 17 ноябрга тайинланган. Унда боксчи ўзига қўйилган айбловларга нисбатан позициясини расман билдириши кутилмоқда. Берлангани айбдор деб топиш ёки топмаслик масаласи суд томонидан ҳал қилинади.

Боксчи сўнгги жангини июль ойида Нью-Йоркда ўтказилган Zuffa Boxing 9 турнирининг асосий баҳсида Стивен Батлерга қарши ўтказиб, еттинчи раундда техник нокаут билан ғалаба қозонганди.