Жавоҳир Синдаров — Clutch Chess: Champions Showdown 2026 чемпиони!

Дунёнинг тўрт нафар гроссмейстери уч кун давомида бош соврин учун баҳс олиб борди. Ҳал қилувчи учинчи кун Жавоҳир асосий рақиби ҳиндистонлик Рамешбабу Праггнанандҳани 4:1, америкалик Фабиано Каруанани 4:1, Ҳикару Накамурани ҳам 4:1 ҳисобида доғда қолдирди. Сўнгги партияда Синдаровнинг чемпионлигига Рамешбабу тўғаноқ бўлиши мумкин эди. Аммо у Каруанага 1:4 ҳисобида имкониятни бой берди.   

Бу турнир Жавоҳир учун ҳиндистонлик амалдаги жаҳон чемпиони Гукеш Доммараджуга қарши Жаҳон тожи учун матч олдидан сўнгги синов бўлди. Мусобақанинг мукофот жамғармаси 425 000 АҚШ долларини ташкил этди. Синдаров 168 000 доллар мукофот пулини қўлга киритди. Жавоҳирдан бир ярим очко кам жамғариб, иккинчи ўрин соҳибига айланган Рамешбабу Праггнанандҳа 109 000 долларга эга бўлди. Учинчи ўрин эгаси Каруана 81 000, сўнгги ўринни эгаллаган Накамура 67 000 долларга эга чиқди. 

Маълумот учун, турнирда ҳар бир шахматчи 18 тадан рапид партия ўйнади. Вақт назорати — 10 дақиқа ва ҳар бир юришга 5 сония қўшиб берилди.

Турнирнинг ўзига хос жиҳати — ғалаба учун бериладиган очколар ҳар куни ортиб борди:

1-кун — 1 очко

2-кун — 2 очко

3-кун — 3 очко

Демак, кеча ўтказилган сўнгги кунги битта ғалаба биринчи кундаги учта ғалабага тенг бўлди. Яъни, ғалабага 3 очко берилди.