04 сен 09:58
Янгиликлар

Теннис

ITF M15 Tashkent. Милушевда мағлубият, бугун ўзбек дербиси бор

Ўтган ҳафта пойтахтимизга яна катта теннис қайтиб, ITF туркумидаги "Grand Palace Cup M15" халқаро мусобақаси ўтказилганди.

Кечадан худди шундай тоифадаги яна бир турнирнинг асосий тўр баҳслари старт олди. Ҳамюртимиз Амир Милушев 1/16 финал босқичида россиялик Александр Биндага қарши кортга чиқиб, 2/6, 2/6 ҳисобида имкониятни бой бериб қўйди. Милушев ATP рейтингида 1690, Бинда эса 1003-поғонадан жой олган.

Бугун икки теннисчимиз Максим Шин ва Раҳимбек Иброҳимов 1/16 финалда ўзаро тўқнаш келишади. Ҳар қандай ҳолатда ҳам ҳамюртларимиздан бири нимчорак финалга йўл олади. Ушбу учрашув соат 14:30да бошланади. Шин рейтингнинг 1131, Иброҳимов эса 1932-поғонасини банд этган.

Шунингдек, бугун яна бир теннисчимиз асосий тўрда ўз омадини синаб кўради. Дамир Абдусамадов ҳиндистонлик Сидҳарт Раватга қарши кортга чиқади. Бу баҳс соат 11:30да бошланади.