Жаҳон кубоги. Шахматчимиз 4-босқичда, яна бирида имконият сақланиб қолди, иккисида эса мағлубият

Дунёнинг 206 нафар шахматчиси қатнашишни бошлаган нуфузли мусобақанинг 1/32 финал босқичида иккинчи учрашувлар бўлиб ўтди. Афсуски, жавоб учрашувларидан сўнг икки гроссмейстеримиз мусобақадаги иштирокини якунлади. Нодирбек Абдусатторов мексикалик Хосе Мартинес Алькантарага иккинчи учрашувда ҳам ютқазиб қўйди. 

Шамсиддин Воҳидов рейтингда ўзидан юқорида бораётган ҳиндистонлик Аржун Эргаиси билан дуранг ўйнади, аммо биринчи баҳсдаги мағлубият сабаб у ҳам Жаҳон кубогидаги иштирокини тўхтатди. Ҳар икки гроссмейстеримиз 11 000 АҚШ доллари миқдоридаги мукофот пулига эга бўлди.  

Жавоҳир Синдаров грециялик Николас Теодоруни чиройли тарзда мағлубиятга учратди. Биринчи учрашувда томонлар муросага келишганди. Жавоҳир икки ўйин натижасига кўра 1,5:0,5 ҳисобида ғалаба қозониб, тўртинчи давра иштирокчисига айланди. Нодирбек Якуббоев вьетнамлик таниқли гроссмейстер Тай Ван Нгуэн билан иккинчи учрашувда ҳам дуранг ўйнади. Бугун улар ўртасида ҳал қилувчи тай-брек партиялари ўйналади. 

Гроссмейстерларимизнинг учинчи босқичдаги илк натижалари: 

Нодирбек Абдусатторов - Хосе Мартинес Алькантара (Мексика) — 0:2 

Жавоҳир Синдаров - Николас Теодору (Греция) — 1,5:0,5

Нодирбек Якуббоев - Тай Ван Нгуен (Вьетнам) — 1:1

Шамсиддин Воҳидов - Аржун Эрагиси (Ҳиндистон) — 0,5:1,5

Номзодлар турнири йўлланмаси учун кечаётган Жаҳон кубогининг бугунги плей-офф учрашувлари бизнинг вақт билан соат 14:30да бошланади.