14 ноя 08:21
Янгиликлар

Шахмат

Жаҳон тожи учун матч. Дуранглар серияси давом этади

Буюк Британиянинг Лондон шаҳри мезбонлик қилаётган шахмат бўйича жаҳон тожи учун чемпионлик матчи тобора ўзининг қизғин палласига кириб боряпти.

Унда амалдаги жаҳон чемпиони норвегиялик Магнус Карлсен (2835) ҳамда даъвогарлар турнири ғолиби америкалик Фабиано Каруана (2832) ўзаро тўқнаш келишмоқда. Дастлабки учта партияда томонлар муросага келишганди.

Кеча ўтказилган тўртинчи турда ҳам кучлар тенг келди. Бу сафар Карлсен оқ доналарда ҳаракат қилди. Лекин жаҳон чемпиони бу кичик устунликдан фойдалана олмади ва якунда дурангга имзо чекди. Бугун турнирда дам олиш куни. Эртага ўтказиладиган бешинчи партия олдидан ҳисоб 2:2 кўринишида бўлиб турибди.

Маълумот учун, шахматчилар ўзаро 12 партияда муносабатларига ойдинлик киритиб олишади. Агар ушбу партияларда ғолиб аниқланмаса, у ҳолда рапид, яъни тезкор шахмат бўйича қўшимча 4та партияга мурожаат қилинади.