Жаҳон тожи учун матч. Мувозанатни ким бузади?

Унда амалдаги жаҳон чемпиони норвегиялик Магнус Карлсен (2835) ҳамда даъвогарлар турнири ғолиби америкалик Фабиано Каруана (2832) ўзаро тўқнаш келишмоқда. Шу кунгача ўн биттта партия ўйналган бўлса, ҳеч бирида ғалаба қайд этилмади. 

Кеча ўтказилган ўн биринчи партияда ҳам томонлар муроса кўчасини танлашди. Қора доналарда ҳаракат қилган Каруана дурангга розилик берди. Бугун жаҳон чемпионатида сўнгги 12-партия ўйналади. Каруана бугун оқ доналарда ўйнайди ва агар ғалаба қозонса, жаҳон чемпионига айланади. Ҳозирча ҳисоб 5,5:5,5 кўринишида бўлиб турибди. 

Маълумот учун, шахматчилар ўзаро 12 партияда муносабатларига ойдинлик киритиб олишади. Агар ушбу партияларда ғолиб аниқланмаса, у ҳолда рапид, яъни тезкор шахмат бўйича қўшимча 4та партияга мурожаат қилинади. Ана шу партиялар жаҳон тожи соҳибини аниқлаб беради.