Жейк Пол янги аёллар бокс лигасини йўлга қўймоқда

Ташкилот ESPN билан кўп йиллик шартнома имзолади, унинг доирасида дастлабки учта турнир 2026 йил апрель ва май ойларида бўлиб ўтади. Бу ҳақда ESPN хабар бермоқда.

"MVP промоушенини ишга туширганимиздан бери биз дунёнинг энг яхши жангчилари иштирокида аёллар боксининг глобал манзилини ташкил қилишга стратегик эътибор қаратдик. Бугун биз янги даврга ғурур билан қадам қўймоқдамиз", - дейди MVP ҳаммуассислари Накиса Бидариан ва Жейк Пол.

Биринчи MVPW-01 тадбири 5 апрель куни Лондондаги Olympia Events’да бўлиб ўтади. Бу илгари эълон қилинган промоушеннинг Буюк Британиядаги дебюти бўлади. Кечанинг асосий жанги енгил вазн тоифасида (61 кг гача) WBC чемпиони британиялик Керолайн Дюбуа ва WBO камари соҳибаси Терри Харпер ўртасида бўлиб ўтади. Шунингдек, кардда иккинчи энг енгил вазн тоифасида (55 кг гача) мутлақ чемпионлик унвони учун баҳс бўлиб ўтади. Унда WBO, IBF ва WBC камарлари соҳибаси британиялик Элли Скотни ҳамда мексикалик WBA чемпиони Майели Флорес тўқнаш келади. Шантель Кэмерон эса биринчи ўрта вазнда вакант бўлиб турган WBO камари учун Михаэла Котасковага қарши рингга кўтарилади.

MVPW ва ESPN ўртасидаги шартнома 2028 йилгача мўлжалланган. Ушбу промоушен ярим енгил вазнда мутлақ жаҳон чемпиони Аманда Серрано, WBC чемпиони Тиара Браун, Эбани Бриджес ва бошқа аёл юлдуз боксчилар билан шартнома имзолаган.