Жо Роган Чимаевни мағлуб этиши мумкин бўлган ягона жангчини айтди

"Унинг кураши ҳаддан ташқари зўр. Агар сен рақобатлаша олмасанг, унда... Мана ўша жангдан кейин Дрикус ҳақида нима деган эдим - бу кураш даражасидаги тафовут шунчалик каттаки, бу Гранд-Каньондан сакраб ўтишга уринишдек гап. Олти ёшлигингга қайтиб, Доғистонда кураш бошлаш учун сенга вақт машинаси керак бўлади... Бу йигит билан фақат зарба беришни ҳам биладиган элита курашчи беллаша олади. Бу йигитга бас кела оладиган одамни кўрмаяпман. Фақат Бо Никал, лекин Бо ҳали жангчи сифатида ўсиши керак, у олдинга силжиши керак ва буни қадамма-қадам амалга ошириб келмоқда. У ниҳоятда интизомли ва фидойи йигит. Кимдир буни уддалай олса ҳам айнан Бо. Чунки унда элита кураши бор", - дея Роганнинг сўзларини келтиради Bloody Elbow.

Маълумот учун, Хамзат Чимаев Шимолий Америка лигаси тарихида профессионал даражада мағлубиятсиз чемпион бўлишга муваффақ бўлган 16-жангчи ҳисобланади. Хамзатнинг рекордида 15 та ғалаба бўлиб, улардан 12 таси муддатидан олдин қўлга киритилган. Никал аралаш яккакурашларда саккизта ғалаба ва битта мағлубият қайд этган.