Жон Жонсга қўйилган айблов бўйича ҳукм ўқилди

Америкалик аралаш яккакураш устасидан йўл-транспорт ходисаси жойини тарк этиш иши бўйича қўйилган айблов олиб ташланди. Бу ҳақда Жонснинг адвокати Кристофер Додд расмий баёнот берди.

"Биз тўлиқ оқландик. Аёл маст ҳолда машина ҳайдагани учун ҳибсга олинишдан қочиб, Жонга қарши ёлғон айблов қўйганини ва афсуски, полиция барча фактларни тўғри баҳоламасдан, бу даъвони қабул қилганини тушунтирдик. Ниҳоят, полиция бошқармаси тегишли ҳужжатларни ошкор қилганида, Жоннинг мобил телефонидаги ёзувлар унинг воқеа жойидан узоқда эканлигини тасдиқлади. Биз округ прокуратурасига вақт ажратиб, бу ишни тўлиқ ва адолатли тергов қилгани ва натижада Жоннинг айбсизлигини тасдиқлагани учун миннатдормиз. Шу билан бирга, шунчалик муҳим далиллар эътиборсиз қолдирилгани ва Жоннинг бу синовдан беҳуда ўтишига тўғри келгани чуқур ташвиш уйғотади. Бу қандай содир бўлгани бўйича суриштирувларимиз ҳали ҳам давом этмоқда", - дейилади баёнотда.

Жон Жонс кеча тушдан кейин Нью-Мехико судига келиши керак эди, аммо ўтган жума куни прокуратура ишни тўхтатиш тўғрисида расмий ариза берди. Шу йилнинг февраль ойида Жонсга йўл-транспорт ҳодисасига учраган аёл айнан у рулда бўлгани ва воқеадан кейин қочиб кетганини айтганди. Натижада Жон йўл-транспорт ҳодисаси жойини тарк этганликда айбланган эди. Полиция маълумотларига кўра, аёл кучли маст ҳолатида бўлган.