Кандрева “Интер”га ўтаётганини тасдиқлади

Бугун “Лацио” клубининг 29 ёшли футболчиси Милан шаҳрига етиб келди ва тез орада тиббий кўрикдан ўтади. Шундан сўнг, Антонио “Интер” билан шартнома имзолайди.  

Италия матбуотида тарқатилган хабарларга кўра, “Лацио” Кандрева учун 22 млн евро олади. Шунингдек, яна 3 млн евро миқдоридаги қўшимча бонусга ҳам эга бўлади.

“Мен ҳамиша “Интер” сафида тўп тепишни истардим. Ана шундай имконият юзага келганидан хурсандман. Ҳали Роберто Манчини билан гаплашдим. Форца Интер, тез орада кўришамиз”, - деди Кандрева.

Маълумот учун, Антонио Кандрева 2012 йилдан бери “Лацио” шарафини ҳимоя қилиб келмоқда. Ўтган тўрт мавсум мобайнида ярим ҳимоячи Рим клубида 151та учрашувда майдонга тушиб, 41та гол киритишга муваффақ бўлди. Кандрева Италия терма жамоаси сафида 2009 йилдан бери ўйнаб келади. Бу орада у 40та ўйинда 4та гол киритди.