Карлсен - Карякин. Жаҳон тожи учун бешинчи баҳсда ҳам дуранг

Бизнинг вақт билан бугун тонг саҳарда амалдаги жаҳон чемпиони норвегиялик Магнус Карлсен ҳамда даъвогар россиялик Сергей Карякин ўртасидаги бешинчи тур учрашуви бўлиб ўтди.

Дастлабки тўртта ўйинда бўлгани каби бу турда ҳам томонлар муросага келишди. Бу сафар Карлсен оқ доналарда ҳаракат қилишига қарамай, рақибини мағлуб эта олмади.

Гроссмейстерлар бешинчи турда итальянча партияни танлашди. Баҳс ўрталарида Карякинда яхши имконият юзага келганди. Лекин у бундан фойдалана олмади. Натижада 51-юришдан сўнг томонлар дурангга рози бўлишди.

Маълумот учун, гроссмейстерлар ўзаро 12та партияда дона суришади. Агар якунда дуранг натижа қайд этилса, 30 ноябрь куни ҳал қилувчи тай-брейк учрашуви ўтказилади.

ЖАҲОН ЧЕМПИОНЛИГИ УЧУН МАТЧ

Нью-Йорк, АҚШ. 5-партия

Магнус Карлсен (Норвегия) – Сергей Карякин (Россия) – 0,5:0,5

Умумий ҳисоб – 2,5:2,5