Карлсен - Карякин. Ниҳоят, дуранглар серияси бузилди, жаҳон чемпиони ютқазди

Бизнинг вақт билан бугун тонг саҳарда амалдаги жаҳон чемпиони норвегиялик Магнус Карлсен ҳамда даъвогар россиялик Сергей Карякин ўртасидаги саккизинчи тур учрашуви бўлиб ўтди.

Дастлабки еттита ўйинда дуранг қайд этилганди. Ниҳоят, саккизинчи турга келиб, сукунат бузилди. Қора доналарда ўйнашига қарамай, даъвогар Сергей Карякин амалдаги жаҳон чемпионини мағлубиятга учратди.

Карлсен 51-юришдан сўнг ўз мағлубиятини тан олди. Бугун шахматчилар дам олишади. Эртага эса тўққизинчи партия учрашуви ўтказилади.

Маълумот учун, гроссмейстерлар ўзаро 12та партияда дона суришади. Агар якунда дуранг натижа қайд этилса, 30 ноябрь куни ҳал қилувчи тай-брейк учрашуви ўтказилади.

ЖАҲОН ЧЕМПИОНЛИГИ УЧУН МАТЧ

Нью-Йорк, АҚШ. 8-партия

Магнус Карлсен (Норвегия) – Сергей Карякин (Россия) – 0:1

Умумий ҳисоб – 3,5:4,5