Касбида бел олиш ва уч кураш бўйича Ўзбекистон чемпионати ўтказилмоқда + ФОТО

Ўзбекистон Республикаси Туризм ва спорт вазирлиги ҳамда Ўзбекистон Бел олиш ва Уч кураш ассоциациясининг йиллик-тақвим режасидаги ушбу мамлакат чемпионатида Қорақалпоғистон Республикаси, Тошкент шаҳри ва барча вилоятлардан 400 нафардан ортиқ ёш полвонлар ғолиблик учун кураш тушишмоқда.

Регламентга мувофиқ, дастлаб Касби туманидаги мазкур спорт мактабининг байрамона безатилган спорт залида тантанали очилиш маросими ташкил этилди.

Маросимда Касби туман ҳокими Тўхтамурод Мейлиев, Ўзбекистон Бел олиш ва Уч кураш ассоциацияси бош котиби Носир Азизов, Қашқадарё вилояти ҳокими ўринбосари – Туризм ва спорт бош бошқармаси бошлиғи Азамат Авазов, туман сектор раҳбарлари иштирок этиб, спортчиларга самимий тилаклар билдиришди. Шундан сўнг мусобақага старт берилди.

Ёш полвонлар дастлаб, Бел олишнинг чалиш, халқа-чалиш, халқа-чалишсиз ҳамда Уч курашнинг яктакли йўналишларида белгиланган  вазн тоифаларига кўра куч синашишди. Бугунга қадар юқорида таъкидланган йўналишлар бўйича барча вазн тоифаларида ғолиб ва совриндорлар номи аниқланди.

Мазкур беллашувларда асосан Қорақалпоғистон Республикаси, Сирдарё, Қашқадарё, Фарғона вилоятларидан келган спортчиларнинг чиқишлари муваффақиятли бўлмоқда. Ғолиб ва совриндорлар диплом, медаль ва эсдалик совғалари билан мукофотланишди.  

Таъкидлаш жоиз, эртага 6 августдан Уч курашнинг яктаксиз ва яктаксиз-халқа йўналишига старт берилади. Беллашувлар 9 августга қадар давом этади.