Кетма-кет 8 марта мағлуб бўлган Тони Фергюсон айни пайтдаги соғлиғи ҳақида гапирди

Тони бу сафар пуэрториколик Натаниэль Бустамантега қарши ўрта вазндаги Misfits Boxing вақтинчалик чемпионлик жангида қатнашади.

"Саккиз мағлубиятдан кейин соғлиғим мени ташвишга солмоқдами? Йўқ. Лекин бу менинг ҳаётимдаги энг оғир беш йил бўлди, ҳақиқий тузоқ. Бу вақт ичида бир марта ҳам кула олмадим. Аммо ҳеч ким мени синган ҳолда кўрмади ва кўрмайди ҳам. Мен буни ҳеч қачон маълум қилмайман. Мана шу менинг “сеҳрим”.

Баъзан менга қайта куч олиш керак бўлади. Бунинг учун жуда кучли чақириқ зарур, шу боис мен боксга киришдим. Ҳали ҳам мураббийларимга қулоқ соламан ва машғулотларда ёрдам бериш учун турли йигитларни чақиряпман.

Ҳозир ўзимни жуда яхши ҳис қиляпман. Балки бошқалардек ўзимни ёмон ҳис қилишим керак эди, лекин йўқ. Мен 41 ёшдаман, 82 йиллик умримнинг ярми. Ўзимни ажойиб ҳис қиляпман. Шу ҳафта рингга чиқаман ва ғалаба қозонаман", — дея Фергюсоннинг сўзларини Bloody Elbow келтиради.