Кормье Перейранинг даъволарига жавоб қайтарди: "Дўст деб ўйлагандим"

Шарҳловчи эса бразилиялик жангчининг даъволарини асоссиз деб ҳисоблайди.

"Алекс Перейра — биз узоқ вақтдан бери кўрган энг яхши жангчилардан бири. У ўрта ва ярим оғир вазн тоифаларида чемпион бўлган, ҳозир эса оғир вазн тоифасида жанг қилмоқда. Алекс бу ерда ўтказган беш йил давомида биз ўртамизда яхши муносабатлар ўрнатдик. Бизнинг муносабатларимиз аъло даражада деб ҳисоблаганман ва ҳатто уни дўст деб ўйлагандим.

Аммо бугун менга Перейранинг интервьюсини кўрсатишди, унда у баъзи гапларни айтган ва ростини айтсам, уларнинг кўпчилиги мени ҳайрон қолдирди. Биринчидан, гап Жош Хокит ва Сирил Ган ўртасидаги жанг ҳақида кетяпти, лекин бу мени унчалик ташвишга солмайди. Муаммо шундаки, у айтган гаплар ҳақиқатга тўғри келмайди.

UFC мендан бу жангни тарғиб қилишни ёки айнан шу жангни ташкил этиш кераклигини айтишимни сўрамаган, аммо фактларни текшириб кўргач, бу жанг ҳақиқатан ҳам мантиқий эканлигига амин бўлдим. Такрорлайман, Алекс Перейрага қарши ҳеч қандай ғаразли ниятим йўқ. Қолаверса, мен уни ўз дўстим деб биламан. Бизда кўплаб ажойиб лаҳзалар, мароқли интервьюлар ва ёқимли суҳбатлар бўлган", — деди Кормье ўзининг YouTube каналидаги видеода.

"Поатан"нинг Кормьега бўлган даъволари фақат Ган ва Хокит жангини тарғиб қилиш билан чекланиб қолмади. Бразилиялик жангчининг сўзларига кўра, интервьюлардан бирида Кормье унга, ҳатто Оқ уйдаги турнирда Ган устидан ғалаба қозонган тақдирда ҳам, у чемпион бўлмаслигини айтган. UFC`нинг собиқ икки вазн тоифасидаги чемпиони бу айбловни ҳам рад этди.

"Ҳаммаси умуман ундай бўлмаган. Бу Оқ уйдаги турнирдан олдин содир бўлган эди. Алекс ўз мураббийи ва таржимони Плинио Круз орқали мендан, агар ғалаба қозонса, барча замонларнинг энг буюк жангчиси бўладими, деб сўради.

Мен у чемпион бўлмайди, демаганман. Мен у ҳали тарихда энг буюк жангчи бўлмаслигини айтганман. Мен ҳар доим ҳақиқатни гапираман. Мен бу йигитларга ёлғон гапирмайман ва гапни айлантириб ўтирмайман. Аммо мен, агар у ғалаба қозонса ва кейин камарини ҳимоя қилса, ўшанда унинг номзодини муҳокама қилишимиз мумкинлигини айтганман.

Албатта, мен у Сирил Ганни енгса, чемпион бўлишини ҳам айтганман. Ва унинг исми тарихда энг буюк жангчилар ҳақидаги баҳсларда тилга олинишини қўшимча қилганман. Балки, гап оддий тушунмовчиликдадир. Биз турли тилларда гаплашамиз ва бу ҳам ўз таъсирини ўтказган бўлиши мумкин", — дея қўшимча қилди Кормье.