Кубалик профессор бошчилигидаги ишчи гуруҳ Навоий вилоятидаги бокс мураббийларига ўз тавсияларини берди

Хабар бериб ўтганимиздек, Ўзбекистон Республикаси Президенти Ш.М.Мирзиёев раҳбарлигида 2022 йил 23 май куни кенгайтирилган тарзда ўтказилган видеоселектор йиғилишида белгилаб берилган топшириқлар ижросини таъминлаш мақсадида Ўзбекистон бокс федерацияси ва Ўзбекистон давлат Жисмоний тарбия ва спорт университети томонидан ишчи гуруҳ тузилганди. 

Кубалик профессор Карлос Вильянуэва бошчилигидаги ишчи гуруҳ вакиллари Республикамиз ҳудудларидаги бокс объектларига сафар қилишмоқда. Ишчи гуруҳ вакиллари дастлабки сафарни Қашқадарёдан бошлашгани ҳақида аввалроқ хабар қилгандик. 

Мутахассисларнинг навбатдаги ташрифи Навоий вилоятига бўлди. Улар вилоятдаги Олимпия захиралари спорт коллежининг бокс залида бўлишди ва у ердаги машғулотлар жараёнини кузатишди. Жаноб Карлос ёш боксчиларнинг машғулотини кузатар экан, улар билан суҳбатлашди, мураббийларга ўзининг тегишли тавсияларини берди, машғулот олиб боришнинг бир қатор янги методларини тушунтириб берди. 

Ишчи гуруҳ аъзолари сафар давомида Навоийдаги аёллар бокс залида ҳам бўлишди. Шуни алоҳида қайд этиш лозимки, навоийлик йигитларга қараганда қизлар Республика миқёсидаги мусобақаларда фаол иштирок этишмоқда. Бу эса вилоятда аёллар бокси потенциали юқори эканлигидан далолат бериб турибди. Мутахассислар аёллар бокс залига ташриф давомида ҳам ўзларининг тегишли тавсияларини беришди ва қизларни мана шу рухда меҳнат қилишда давом этиш лозимлигини алоҳида таъкидлашди.