Магнус Карлсен 14 ёшли Нодирбекни эътироф этди!

Хабар берганимиздек, Абдусатторов Биледаги иштирокини бир вақтнинг ўзида 16 ёшгача бўлган 16 нафар шахматчига сеанс бериш билан бошлаган эди. Нодирбек 16 партиянинг 15тасида ғалаба қозонган ва фақат биттасида дуранг натижа қайд этганди. Ўн тўрт ёшли ҳамюртимизнинг бу мастер-класси, яъни маҳорат сабоғи жаҳон чемпиони Магнус Карсленнинг эътирофига сазовор бўлди. Карлсен маҳаллий телевиденияга берган интервьюсида 13 ёшида дунёнинг энг ёш иккинчи гроссмейстерига айланган Нодирбекни алоҳида тилга олган. 

Ана шундай “ақлий ҳужум”дан сўнг ҳамюртимиз нуфузли Swiss Rapid Chess Championship мусобақасида муваффақиятли тарзда иштирок этди. Швейцарча тизимда 9 турдан иборат бахсларда Абдусатторов 7 очко билан қўшимча кўрсаткичларга кўра тўртинчи ўринни эгаллади. Энг яхши натижага 8 очко тўплаган россиялик Михаил Антипов (Россия, 2621) эришди. Мусобақада 2-3 ўринларни 7,5тадан очко жамғарган гроссмейстерлар - Аравиндх Читамбарам (Ҳиндистон, 2597) ва Александр Донченко (Германия, 2577) банд этишди. 

Нодирбек тезкор шахмат мусобақасидан сўнг стандарт шахмат баҳсларида ҳам иштирок этди. Биледа ўтаётган халқаро фестивалнинг Master Tournament мусобақасида 31 давлатдан келган 117 шахматчи ўз маҳоратини намойиш этяпти. Улар орасида жаҳон чемпиони Магнус Карлсен бошчилигидаги 6 нафар супер гроссмейстерлар ҳам бор. Нодирбек  Абдусатторов (2534 стандарт бўйича рейтинги) турнирда 23-рақам остида таснифланган бўлиб, илк турда швейцариялик шахматчини мағлуб этди.