Медведев фаолиятидаги 40-турнири финалида ўйнайди

Дунёнинг 14-ракеткаси Даниил Медведев мусобақанинг финалига йўл олди. Россиялик теннисчи 1/2 финалда ATP рейтингида 138-поғонада бораётган австралиялик Жеймс Даквортни уч сет натижасига кўра мағлубиятга учратди - 6/7(8), 6/3, 6/2. Бу теннисчиларнинг ўзаро ўтказган иккинчи учрашуви бўлди - 2:0. 

Икки соату 13 дақиқа давом этган баҳсда Медведев 15, Дакворт 12 та эйс зарбасини амалга оширди. Қўшхатоларда Даниил мутлақ "устунлик" қилди - 8 га 0. Медведев бу йилги мавсумда иккинчи, фаолиятида 40-маротаба ATP турнири финалига чиқди. У Галле турнири финалида қозоғистонлик Александр Бубликка ютқазиб қўйганди.

Бугун Медведев Олма-Ота турнири бош соврини учун франциялик Корентен Мутега қарши кортга чиқади. Муте 1/2 финалда америкалик Алекс Микельсендан устун келди.