Нганнунинг PFL дебют жангидаги эҳтимолий рақиби маълум

Камерунлик аралаш яккакураш устасининг рақиби катта эҳтимол билан америкалик боксчи, собиқ жаҳон чемпиони Деонтей Уайлдер бўлади. Бу ҳақда PFL асосчиси Дон Дэвис хабар берди.

"Мен шаффоф бўлиш тарафдориман. Очиғи, Нганнунинг қачон дебют қилишини биз билмаймиз. Лекин шуниси аниқки, у 2024 йилда PFL байроғи остида юз фоиз кафолати билан жанг ўтказади. Билишимча, бу жанг аралаш яккакураш қоидалари асосида бўлиб ўтади. Унинг рақиби катта эҳтимол билан Деонтей Уайлдер бўлади. Уайлдернинг ўзи ҳам бу жангни истаяпти. Бу бокс ва ММА олами учун катта янгилик бўлар эди. Бу жанг турганида, иккинчи ва учинчи вариантлар ҳақида ўйлаш мантиқсизлик", — деди Дэвис MMA Hour нашрига берган интервьюсида.

Эслатиб ўтамиз, Деонтей Уайлдер фаолиятида ҳеч қачон аралаш яккакураш усулида жанг ўтказмаган. Унинг боксдаги профессионал рекорди 43 ғалаба, 1 дуранг ва 2 мағлубиятни ташкил этади. Уайлдер 23 декабрь куни Саудия Арабистонининг Ар-Риёд шаҳрида Жозеф Паркерга қарши рингга кўтарилади.