Нодирбек Абдусатторов "Aimchess Rapid" турнирида биринчи ўринни эгаллаб турибди

Мукофот жамғармаси 150 минг АҚШ долларини ташкил этувчи мусобақада жаҳоннинг етакчи шахматчилари қаторида ҳамюртимиз Нодирбек Абдусатторов ҳам баҳсларда иштирок этмоқда. 

Жаҳоннинг 16 нафар шахматчиси қатнашаётган мусобақада ҳозирча 4 та тур ортда қолди. Абдусатторов илк турда Миттал Адитя (Ҳиндистон), иккинчи турда Ричард Раппорт (Руминия), учинчи турда Давид Антон Гуижарро (Испания) ни мағлуб этди. Тўртинчи турда эса ҳиндистонлик Аржун Еригаиси билан дуранг ўйнади. 

Нодирбек учта ғалаба ва битта дурангдан сўнг 12 имкониятдан 10 очко жамғариб турибди. Битта ғалаба учун шахматчиларга уч очко берилади. 

Дастлабки босқичда барча шахматчилар ўзаро ўйин ўтказишади, яъни 15 та учрашув. 

Кейин эса нокаут тизимида баҳслар ўтказилади. 

Мусобақада Магнус Карлсен, Шаҳрияр Мамедяров, Дуда, Гукеш ва бошқа таниқли шахматчилар иштирок этишмоқда.