Нодирбек Абдусатторов "Aimchess Rapid" турнирида ҳамон пешқадам!

Мукофот жамғармаси 150 000 АҚШ долларини ташкил этувчи ушбу нуфузли турнирда жаҳоннинг рейтинги баланд гроссмейстерлари ғолиблик йўлида дона суряпти. Юлдуз шахматчилар қаторида ҳамюртимиз Нодирбек Абдусатторов ҳам баҳсларда муваффақиятли иштирок этяпти. 

Қувонарлиси, тезкор шахмат бўйича жаҳоннинг энг ёш ва шу билан бирга амалдаги чемпиони ҳисобланган Нодирбек ортда қолган 8 тур натижаларига кўра дунёнинг энг кучли 16 нафар шахматчиси орасида турнир пешқадами бўлиб турибди. Абдусатторов кечаги баҳсларга қадар Миттал Адитя (Ҳиндистон), Ричард Раппорт (Руминия), Давид Антон Гуижарро (Испания) ни мағлуб этиб, ҳиндистонлик Аржун Еригаиси билан дуранг ўйнаганди. 

Кеча тунда ўтказилган партияларда ҳам Абдусатторов анча ишончли ҳаракат қилди. Фақат 5-турда у ҳиндистонлик Видит Сантошга қора доналарда имкониятни бой бериб қўйди. Олтинчи турда бошқа бир ҳинд гроссмейстери Доммарджу Гукеш таслим этилди. Нодирбек Гукешни 44-Бутунжаҳон шахмат Олимпиадасининг муҳим баҳсида ҳам мағлубиятга учратганди. Еттинчи партияда ҳамюртимиз қора доналарда ўйнашига қарамай, ҳиндистонлик таниқли гроссмейстер Пентала Харикришнани енгди. Саккизинчи турда яна қора доналарда ҳаракат қилган Нодирбек рейтингда ўзидан юқорида бораётган нидерландиялик Аниш Гири билан муросага келди. 

Нодирбек 5 та ғалаба, 2 та дуранг ва 1 мағлубиятдан сўнг 24 имкониятдан 17 очко жамғариб, турнир жадвалида якка пешқадамликни давом эттирмоқда. Кучли учликдан озарбайжонлик Шахрияр Мамедьяров ва жаҳон тождори Магнус Карлсен жой олган. Улар ҳисобида 16 очко бор. Битта ғалаба учун шахматчиларга 3, дурангга 1 очко берилади.