Нодирбек Абдусатторов гуруҳ босқичида энг кўп очко тўплади. Унинг 1/2 финалдаги рақиби маълум

Мукофот жамғармаси 400 минг АҚШ долларини ташкил этувчи ушбу нуфузли турнирда гуруҳ босқичи якунланиб, 1/2 финал жуфтликлари маълум бўлди. Абдусатторов исландиялик Хёрвар Стейн Гретарссон, россиялик FIDE байроғи остида дона сураётган Ян Непомняший ва АҚШ вакили Уэсли Сони мағлуб этиб, муддатидан аввал ярим финалга йўл олганди. 

Кеча тунда ўтказилган партияларда Нодирбек Непомняшийни яна икки бор мағлубиятга учратди. Уэсли Со билан такрорий баҳсларда битта дуранг ва мағлубият қайд этди ҳамда 10 очко билан гуруҳ ғолиби сифатида 1/2 финалга йўл олди. Ян Непомняший 7 очко билан иккинчи ярим финалчига айланди. 

Эътиборга молик жиҳати шундаки, Нодирбек Абдусатторовгуруҳ босқичида энг кўп очко жамғарган шахматчи бўлди. Амалдаги жаҳон тожи соҳиби Магнус Карлсен 9 очко билан B гуруҳида 1-ўринни эгаллади. Америкалик Хикару Накамура ҳам 9 очко жамғарди ва қўшимча кўрсаткичларга кўра гуруҳда иккинчи бўлди. 

Бугун мусобақада дам олиш куни. Эртага ярим финал учрашувлари ўтказилади. А гуруҳи ғолиби Нодирбек Абдусатторов B квартетида иккинчи ўринни банд этган Хикару Накамурага қарши дона суради. Иккинчи ярим финал жуфтлигида Магнус Карлсен ва Ян Непомняший учрашишади.  

World Fischer Random Chess Championship. 1/2 финал

Нодирбек Абдусатторов (Ўзбекистон) - Хикару Накамура (АҚШ)

Ян Непомнящий (ФИДЕ) - Магнус Карлсен (Норвегия)